XIII-XVII əsrlərdə Təbriz şəhəri (Sosial-iqtisadi tarixi)

Bakı, "Elm", 1982, 283 səh.
Təqdim edilən bu əsərdə biz Təbrizin ictimai-iqtisadi həyatının, xüsusilə 500 illik bir dövrdə məhsuldar qüvvələrin inkişafı və istehsal münasibətləri məsələlərinin tədqiqinə geniş yer vermişik. Məhz buna görə də Təbrizin siyasi tarixi, yeri gəldikcə, ictimai-iqtisadi məsələlərlə əlaqədar şərh edilmişdir. Digər tərəfdən, Təbriz tarix boyu Azərbaycanda baş verən siyasi hadisələrin mərkəzi olduğu üçün Sovet Azərbaycanı alimləri bəhs etdiyimiz dövrdə Azərbaycanın siyasi tarixini tədqiq edərkən Təbrizdə baş verən siyasi hadisələri də işıqlandırmışlar. Bunu nəzərə alaraq, Təbrizin siyasi tarixindən ayrıca bəhs etməyi lüzumsuz sayırıq.